22 November 2020
Die sout-en-peper baard klik sy ouderdom maar andersins lyk die 45-jarige Thinus Delport nog of hy steeds op Ellispark onder die All Blacks kan uithardloop. Ek het die oud Bok by Olivias by Nortcliffcorner ontmoet, sowat 'n klipgooi van 6e Straat in Linden waar ons sowat 23 jaar die eerste keer gepraat het.

Thinus is deesdae 'n skaars artikel hier plaaslik. Hy woon in die Cottswolds. Die dorpie Cowley in Gloucestershire is 'n landelike gemeenskap sonder 'n winkel of kerk. Dit is waar hy en sy Britse vrou Lora hul twee spruite Ruan Jacques (10) en Hollie Rose (8) grootmaak.

Hy is in die in-en uitvoer van hoofsaaklik citrus betrokke en is ‘n gereelde besoeker wat plase wyd en syd dwarsoor die land besoek. Thinus het in 18 toetse vir die Bokke gespeel en lank vir die Leeus en Cats gespeel voordat hy vir Gloucester en later vir Worcester uitgedraf het.

Kirkwood is egter sy hartland waarheen hy eendag wil terugkeer en waar sy liefde vir die cirtusbedryf gekweek is. Dit is ook waar die Delports en Oliviers se rugbywortels lê. Pa Gerhard het lank vir die OP heelagter gespeel, oom Ters was 'n bedrewe skrummie wie vir die Maties uitgedraf het.

Die oud OP haker Kobus Delport is ‘n neef van sy pa en die 51 Springbokhaker Willem is ook verwant. Dan loop die famieliebloed ook deur die Boksenter Eben Olivier wie se broer Eric ook provinsiale rugby gespeel het. Die Bokke in die 30s, Jan en Anton Stegman was sy oupa aan sy ma se kant se ooms.

Hy is nou in die derde fase van sy lewe - die eerste 35 jaar waarin hy rugby gespeel het, toe nege jaar in afrigting en televisiewerk en nou hopelik vir die volgende 20 in die citrusbedryf.

Mens kan ook nie altyd in ‘n sweetpak en tekkies rondloop nie.