P. J. (FLIP) GEEL is geen onbekende in Noord-Transvaal nie. Gebore in Boshof is hy tans 33 jaar oud, weeg 235 pond en is ses voet twee duim lank. Hy het op skool in Christiana die liefde vir rugby ontwikkel en was lid van die Wes-Transvaalse Sub-uniespan op 17-jarige leeftyd. In 1934/35 het hy die Griekwas-trui gedra en in 1936 het hy vir Noord teen Suid in die proefwedstryd gespeel. Die volgende jaar het hy twee wedstryde vir Transvaal gespeel en toe het hy wortel geskiet in Noord-Transvaal se span, wat hy ook gelei het totdat hy na die Vrystaat in 1948 verhuis het. In laasgenoemde jaar was hy kaptein van O.V.S.