Klippies Kritzinger het in die Vrystaat groot geword, was op Harrismith op skool en het in 1967 vir die Vrystaat Cravenweekrugby gespeel.

Hy het vir Durban Collegians gespeel toe hy vir Natal gespeel het en toe vir die 1972 Gaselle wat Argentinië toe getoer het. Hy het ook vir die Junior Springbokke uitgedraf. Klippies het gedurende sy eersterangse loopbaan vir verskeie Unies uitgedraf: Natal, Transvaal, Vrystaat, Noord-Vrystaat en Wes-Transvaal.

Het in 1974 vir Transvaal uitgedraf toe hy vir Springbokke teen die magtige Britse Leeus gekies is. Hy is as agtsteman gekies in die berugte derde toets in Port Elizabeth met Gerrie Sonnekus op skrumskakel. Toe die Leeus hul 99-kreet roep het hy Gordon Brown uitgeslaan.

Vir die vierde toets op Ellispark is hy flank toe geskuif met Kleintjie Grobler die vierde agtsteman in vier toetse. Daarna is hy vir die toer Frankryk toe gekies en in sewe wedstryde gespeel, insluitend die toetse in Toulouse en Parys, wat die Bokke albei gewen het.

In 1975 het hy die Vrystaat in sy heel eerste wedstryd vir hulle aangevoer. Hy het dié jaar in albei wentoetse in Bloemfontein en Pretoria gespeel. In 1976 het Klippies in die vierde toets teen die All Blacks op Ellispark gespeel wat die Bokke 15-14 gewen het.

Met drie jaar se rugbyisolasie wat gevolg het, was dit sy laaste toets. Johannes Lodewyk Kritzinger het na sy debuuttoets nie weer in ‘n verloortoets gespeel nie.