Was in die W.P. as die volgende Springbok-skrumskakel beskou. Besonder groot en sterk vir 'n skrumskakel. Vernaamste kenmerk die geweldige aangeë wat hy uitslinger. Kan ook baie ver skop en breek soms gevaarlik. Wahl is 26 jaar oud en het sy skoolopleiding aan die Paarlse Gimnasium ontvang.

Sy vader was inspekteur van skole, met die gevolg dat Ballie as seun in verskeie dele van die land skoolgegaan het. Later het hy aan die Universiteit van Stellenbosch studeer en vir die Maties se senior span gespeel. Van Stellenbosch is hy na die Paarl, vir wie hy reeds drie seisoene speel.